Hovudregelen er at du har rett til støtte til vanleg vidaregåande opplæring i tre år og til all anna utdanning i åtte år.
Vanleg vidaregåande opplæring
Vanleg vidaregåande opplæring vil seie undervisning som følgjer opplæringsplanen for offentlege vidaregåande skolar.
Har du fullført grunnskolen, har du som regel rett til vidaregåande opplæring i tre år eller i fastsett opplæringstid for faget. Du må bruke retten innan fem år etter at du fullførte grunnskolen, eller seks år dersom du er lærling og tek ein del av opplæringa i ei lærebedrift.
Du kan få støtte til vanleg vidaregåande opplæring i så lang tid som du har denne retten. Det betyr til vanleg i tre år, eller i fire år om du skifter utdanning. Dersom du er i vidaregåande opplæring utan slik rett, får du stipend og lån etter reglane for anna utdanning (sjå nedanfor).
Dersom du tek utdanning som tilsvarer vanleg vidaregåande opplæring utanfor Noreg, kan du få støtte i opptil fire år eller i normert tid for utdanninga. Dersom du har fått støtte til vanleg vidaregåande opplæring i Noreg, blir støttetida redusert tilsvarande.
Høgare utdanning og anna utdanning
Du kan få støtte i opptil åtte år til saman til høgare utdanning og til anna utdanning utover vanleg vidaregåande opplæring.
Det blir ikkje gitt støtte i meir enn to år til folkehøgskole.
Du kan ikkje få støtte i meir enn åtte år sjølv om du skulle bli forseinka.
Det blir gjort unnatak dersom du er forseinka på grunn av sjukdom, på grunn av at du har fått barn i utdanningsperioden, eller på grunn av redusert funksjonsevne. I det siste tilfellet er det eit krav at du mottek stønad frå folketrygda.
Tar du ei Ph.D-utdanning i utlandet, kan du få støtte i opptil ti år etter reglane for høgare og anna utdanning.