Du kan få ettergitt ti prosent av det opphavlege lånet, maksimalt 25 000 kroner per år, dersom du bur og arbeider i Finnmark eller Lyngen, Storfjord, Kåfjord, Skjervøy, Nordreisa, Kvænangen og Karlsøy.
Ettergivinga skjer på etterskott når du har budd og arbeidd i regionen i tolv månader samanhengande.
Busett og yrkesaktiv
Busett
Vi reknar deg som "busett" når du både har folkeregistrert adresse i regionen og faktisk bur der.
Yrkesaktiv
Vi reknar deg som "yrkesaktiv" når du
- har arbeid som utgjer minst 50 prosent av fulltidsarbeid
- har fulltidsarbeid i minst seks månader, og er registrert som arbeidssøkjar til fulltidsarbeid i resten av oppteningsperioden
- har omsorg for barn under ti år, eller har særleg tyngjande omsorgsplikter i den nærmaste familien
- har studiepermisjon med lønn eller stipend som utgjer minst 50 prosent av full stilling, der lønna blir betalt av ein arbeidsgjevar i regionen
- er tilsett i transportsektoren, på skip, oljeleitingsfartøy eller faste installasjonar på kontinentalsokkelen og er busett og skattepliktig i regionen
Slik søkjer du
Søknaden om ettergiving sender du når du har budd og arbeidd i regionen i tolv månader samanhengande (ein oppteningsperiode). Du må sende søknad for kvar ny oppteningsperiode.
Bruk søknadsskjema F, "Søknad om ettergivelse for låntakere i Finnmark og Nord-Troms", som du skriv ut frå samlesida for skjema.
Du må leggje ved dokumentasjon på yrkesaktivitet. Dersom du har vore arbeidsledig, må du også dokumentere det. Søkjer du på grunn av omsorg, legg du ved kopi av fødselsattest, eventuell attest på at du har særleg tyngjande omsorgsplikter i den nærmaste familien.
Søknadsfrist
Søknaden må vere motteken av Lånekassen seinast tre månader etter at oppteningsperioden er ute, for at kravet ikkje skal bli forelda.
Les meir