Utveksling til eit universitet eller ein høgskole

Dersom du skal på utveksling frå ein lærestad i Noreg vel du dette i søknaden din. I same søknad kan du leggje ved informasjon om lærestaden din i Noreg.

Veileder Utveksling

Ung kvinne med sekk. Foto.

Studere i utlandet

Lånekassen tilbyr stipend og lån til utveksling utanfor Norden. Nokre land gir meir i stipend.

Søknadsfristar

Du må ha ein studieplass før du søker, og du kan tidlegast søke i midten av mai. Siste frist for å søke er

  • 15. november for heile året eller berre haustsemesteret
  • 15. mars for vårsemesteret

Lærestaden din må godkjenne utvekslinga

Når du skal på utveksling, er det lærestaden der du tek hovudutdanninga som godkjenner utvekslinga. For å kunne få stipend og lån, må utvekslinga på førehand vere godkjend som ein del av graden din. Du blir spurd om dette i søknaden, så vent derfor med å søke til du veit at lærestaden din har godkjent utvekslinga.

I tillegg må opphaldet vare i minst fire veker. Lærestaden din kan gi deg meir informasjon om korleis du søker om førehands­godkjenning av utveksling i utlandet.

Dei fleste treng ikkje sende dokumentasjon

Dei fleste norske lærestader gir oss informasjonen vi treng om utvekslinga, så du skal ikkje sende oss noko med mindre du får beskjed om det. I nokre tilfelle, for eksempel dersom du studerer på BI, må du laste opp dokumentasjon som viser at utvekslinga er godkjend. Les meir om dette lenger nede på sida.

Alle studentar får basislån og reisestøtte

Dei fleste får tre forskjellige typar støtte til utveksling til eit utanlandsk universitet: Basislån, reisestøtte og støtte til skolepengar om du skal betale skolepengar.

Basislån kan alle studentar få, og dette er namnet på det dei fleste kallar studielån. Basislånet er eit lån, ikkje eit stipend, men inntil 40 prosent av dette lånet kan bli gjort om til stipend dersom du ikkje bur saman med foreldra dine, du består utdanninga og graden din, og har inntekt og formue under grensene.

Betaler du skolepengar, kan du få stipend og lån til dekning av det, opp til eit maksbeløp som er avhengig av kvar du studerer og kor mykje du skal betale.

Vi gir også reisestøtte som tilskott til to tur-returreiser til den verdsdelen du studerer i.

Nokre land gir meir stipend

Dersom du skal på utveksling til Brasil, India, Japan, Kina, Sør-Afrika eller Sør-Korea, får du 4 401 kroner i månaden i tillegg til basislån og reisestøtte. Dette stipendet kan du få i inntil ti månader.

For å få dette stipendet, må du:

  • dra på utveksling til eit av desse landa frå ein lærestad i Noreg, eller
  • ta heile graden din i eit av desse landa

Det betyr at dersom du allereie har begynt på ein heil grad i eit land utanfor Noreg som ikkje er eit av desse landa, og drar på utveksling til Brasil, India, Japan, Kina, Sør-Afrika eller Sør-Korea, får du ikkje dette stipendet.

Gjeld og nedbetaling

Lån frå Lånekassen er rente- og avdragsfritt så lenge du er fulltidsstudent og får støtte frå oss. Når du ikkje lenger får støtte til fulltidsutdanning frå Lånekassen, blir det lagt til renter på lånet og du må begynne å betale rundt 9 månader seinare.

Gå til søknaden

Dokumentasjon du må laste opp sjølv

Dei fleste som skal på utveksling, treng ikkje sende oss noko. Men det finst nokre unntak.

Det er tre tilfelle der du sjølv må sende oss dokumentasjon:

  • dersom du skal betale skulepengar til lærestaden i utlandet
  • dersom lærestaden din ikkje brukar Felles studentsystem (FS)
  • dersom du skal på språkkurs (eiga side)

Du skal dokumentere godkjenning dersom lærestaden din ikkje brukar FS

Dersom lærestaden din brukar FS (Felles studentsystem), skal dei registrere informasjon om utveksling der. Då hentar vi desse opplysningane automatisk, og du treng ikkje sende oss dokumentasjon om godkjenning.

Sjå kva for lærestader som brukar Felles studentsystem på nettsidene til FS.

Dersom du ikkje finn lærestaden din i denne lista, brukar dei ikkje FS. BI og Bjørknes gjer for eksempel ikkje det. Då må du sende inn eit eige skjema etter at du har søkt om lån og stipend. Lærestaden din må stemple og godkjenne skjemaet før du lastar det opp på Dine sider.

Gå til skjema for utveksling (nederst på sida)

Du må dokumentere at du betaler skulepengar

Skal du betale skulepengar, må du laste opp ei signert stadfesting (eit offisielt brev) frå lærestaden i utlandet som viser namnet ditt og kor mykje du skal betale i skulepengar. Dette gjer du på sida Send dokumentasjon etter at du har logga inn på Dine sider.

Dokumentet må tydeleg vise kva som er skulepengar (tuition fee), og kva som er andre utgifter. Dette er fordi Lånekassen ikkje dekkjer utgifter til for eksempel studentforeiningar, administrasjonsgebyr og bibliotekavgift.

Vi godtek ikkje Confirmation of Enrolment aleine som dokumentasjon på skulepengar, fordi det ikkje viser eventuelle rabattar norske studentar får.

Får du stipend frå andre enn Lånekassen som er meint å dekkje skulepengar, må du leggje ved ei stadfesting som viser beløpet.

Er du over 30 år?

Du kan søke om inntil
119 240
i tilleggslån per år

Du kan låne inntil 119 240 kroner ekstra i året dersom du studerer på fulltid, som er 60 studiepoeng per år. Tar du færre studiepoeng, får du tilbod om å låne eit mindre beløp. Du kan låne 238 480 kroner til saman, og du kan velje kor mange år du vil fordele lånet over. Du søker om lånet i den same søknaden som vanleg lån og stipend.

Lånet kan ikkje kombinerast med tilleggslån for dei som har barn.

Les meir om tilleggslån

Har du barn?

Du kan få ekstra
stipend og lån
om du har eller får barn

Får du barn under studia, eller innan sju månader etter du har fullført ein grad, kan du få foreldrestipend.

Foreldrestipend ved fødsel eller adopsjon

Dersom du får barn medan du studerer, kan du få gjort om basislån og skolepengelån til stipend i inntil 49 veker.

Barnestipend

Dersom du har barn under 16 år, kan du få ekstra stipend. Har du fleire barn, får du meir stipend. Barnestipendet blir behovsprøvd. Det betyr at beløpet blir mindre om familien har inntekt eller formue over grensene i forskrifta. Dersom du studerer på deltid, får du også eit lågare beløp.

Tilleggslån

Du kan også låne 59 620 kroner ekstra i året når du har barn under 16 år, avgrensa til 119 240 kroner til saman. Inntekt og formue har ikkje noko å seie for om du kan få tilleggslån. Dersom du studerer på deltid, får du tilbod om å låne eit mindre beløp.

Les meir om barn og fødsel

Språkkurs
Er undervisningsspråket eit anna enn engelsk, kan du få støtte til språkkurs.
Utvida stipend til skolepengar
Nokre lærestader i utlandet gir rett til ekstra stipend til skolepengar.

Når ting skjer

Når noko skjer i livet ditt eller i studiekvardagen din, kan det ha konsekvensar for kva du kan få frå Lånekassen, enten no eller i framtida.
Ung gut med bok og ung jente med mobil. Foto.

Omgjering av lån til stipend

Inntil 40 prosent av basislånet kan bli gjort om til stipend dersom du består utdanninga di og fullfører ein grad.

Den norske lærestaden din rapporterer til Lånekassen

Tar du utveksling frå ein norsk lærestad, får vi opplysningane om at du har bestått utdanninga direkte derfrå. Derfor treng du ikkje å sende noko inn til oss for å få lån gjort om til stipend.

Har du tatt utveksling frå ein utanlandsk lærestad, må du dokumentere resultata dine sjølv for å få omgjering. Du treng ikkje sende eksamensresultat før du har fullført graden din.

Spesielt for studentar som tek lengre språkkurs før utveksling

Du kan og få basislån til å ta eit språkkurs i land utanfor Skandinavia. For at 40 prosent av lånet du fekk til å ta språkkurs skal bli gjort om til stipend må du oppfylle nokre krav.

Du må ha bestått kurset og eventuell språkeksamen, og begynne på utdanning i det same landet innan eitt år etter du er ferdig med kurset.

Les meir om lån og stipend til språkkurs.

Les meir om dei generelle reglane for omgjering

Nyttige lenker

Regelverk